Еуро-2024 чемпионаты іріктеу кезеңінің 8-турында Финляндия жеңілді. Бұл туралы Sanur.kz ақпарат агенттігі хабарлайды.
Фин жерінде өткен қарымта матчтың 28-минутында Роберт Тейлор есеп ашты. Ал екінші таймда Қазақстан құрамасы шабуылды үдетіп, 77-минутта Бахтияр Зайнутдинов пенальтиде есепті теңестірді.
Ал 90-минутта бұрыштамадан асырылған пасты сәтті пайдаланған Зайнутдинов дубль авторы атанды. Осылайша Бахтияр ұлттық құрама сапында салған гол есебі бойынша үздік бомбардир Руслан Балтиевті асып түсті.
Еуро-2024: қазақстан құрамасы Даниядан ойсырай ұтылды
Қазақстан құрамасы Н тобында бақ сынасып жатыр. Еліміз кезекті жеңістің арқасында 15 ұпаймен 3-орынға көтерілді. Ал Финляндия құрамасы 12 ұпаймен 4-орынға табан тіреген. Әзірге көш басында 16 ұпаймен Cловения, 2-орында Дания тұр.
Қазақстан құрамасы әлі де Еуропа чемпионаты финалдық сатысына берілетін жолдамаға таласатын мүмкіндікке ие болып отыр. Енді ұлттық құрама 17 қарашада Сан-Мариномен, 21 қарашада Солтүстік Ирландиямен ойын өткізеді.
Бұған дейін екі құрама ресми ойындарда бес мәрте кездесіп, барлығында финляндиялық футболшылар жеңіске жеткен еді. Мәселен, Еуро-2024 іріктеу кезеңінің 5-турында Астана қаласында Финляндия Қазақстан құрамасын 1:0 есебімен жеңіп кеткен.