Skip to content
Главная страница » БИЗНЕСТІ ТЕКСЕРУ ЕДӘУІР ҚЫСҚАРАДЫ – ӘЛИХАН СМАЙЫЛОВ

БИЗНЕСТІ ТЕКСЕРУ ЕДӘУІР ҚЫСҚАРАДЫ – ӘЛИХАН СМАЙЫЛОВ

     Биыл заңнамадан бизнес үшін 10 мың керексіз талаптар алынып тасталады. Бұл туралы елдің әлеуметтік-экономикалық мәселелері жөніндегі кеңейтілген кеңесте Үкімет басшысы Әлихан Смайылов айтты, деп хабарлайды Sanur.kz.

    Премьер-Министр қазіргі уақытта республикада бизнеске қатысты кәсіпкерлік қызмет саласында жаңа реттеуші саясат енгізіліп жатқанын атап өтті. Қаңтар айынан бастап міндетті талаптар реестрі ашық түрде жарияланды.

      «Енді реестрде жоқ талаптар бойынша тексерулер жүргізілмейді. Биыл заңнамадан бизнес үшін 10 мың керексіз талап алынып тасталады. Бұл тексерулердің санын едәуір қысқартады. Сондай-ақ осы жылдың соңына дейін тәуекелдерді басқару жүйелерін автоматтандыру толығымен аяқталады», — деді Премьер-Министр.

      Оның айтуынша, биыл шағын және орта бизнесті жүйелі түрде қолдау шаралары кеңейтілді. Өңдеу өнеркәсібін дамыту мақсатында қолдау көрсетілетін қызмет түрлерінің тізбесі (жеңілдетілген несиелер және қаржылық лизинг) 116-ға ұлғайды. Бірқатар басым қызметтер бойынша проценттік мөлшерлемені субсидиялау мерзімі 5 жылдан 7 жылға дейін ұзартылды.

     Бизнестің жол картасын қаржыландыру көлемі 224 млрд теңгеге дейін ұлғайды. Шағын және орта бизнесті қолдау аясында биыл 20 мыңнан астам жобаны субсидиялау, 18 мыңнан астам жобаға кепілдік беру көзделіп отыр. Орта бизнесті қолдау бойынша қосымша шаралар қабылданады.

Пікір үстеу

Э-пошта мекенжайыңыз жарияланбайды. Міндетті өрістер * таңбаланған