Skip to content
Главная страница » ЖЕҢІЛДЕТІЛГЕН МИКРОКРЕДИТ АЛУҒА ЖАСТАРДАН 800-ГЕ ЖУЫҚ ӨТІНІМ ТҮСКЕН

ЖЕҢІЛДЕТІЛГЕН МИКРОКРЕДИТ АЛУҒА ЖАСТАРДАН 800-ГЕ ЖУЫҚ ӨТІНІМ ТҮСКЕН

     Кәсіпкерлік бастамаларды іске асыру үшін жастарға жылдық 2,5%-бен берілетін микрокредит алуға 761 өтінім түскен, деп хабарлайды Sanur.kz Еңбек және халықты әлеуметтік қорғау министрлігіне сілтеме жасап.

    10 сәуірдегі мәлімет бойынша, «Аграрлық кредиттік корпорация» АҚ-ға кәсіпкерлік бастамаларды іске асыру үшін жастарға жылдық 2,5%-бен берілетін жеңілдетілген микрокредит алуға 761 өтінім түскен. Жалпы, биыл 5 796 микрокредит беру жоспарланып отыр.

   Микрокредиттер жеке кәсіпкер ретінде тіркелген 21 жастан 35 жасқа дейінгі жастарға өз ісін ашу немесе кеңейту үшін, 5 жылдан аспайтын мерзіммен беріледі. Бұл ретте қатысушылардың «Аграрлық кредиттік корпорация» АҚ-ға өтініммен жүгінген уақыттағы жасы ескеріледі.

   Микрокредиттің мөлшері 5 млн теңгеге дейін, ал қатысудың ең ұзақ мерзімі – 5 жылдан (кез келген мақсатқа) 7 жылға дейін (мал шаруашылығы саласындағы жобалар үшін) болуы мүмкін.

      Номиналды сыйақы мөлшерлемесі – жылдық 2,5%-дан аспайды.

    Микрокредит алушылар үшін негізгі борыш пен сыйақыны өтеу бойынша жеңілдік кезеңі беріледі, ол микрокредит мерзімі ұзақтығының үштен бірінен аспайды.

 Кепілмен қамтамасыз ету – міндетті шарт. Оған жылжымалы (мамандандырылған техника) және жылжымайтын мүлік қабылданады. Кепілмен қамтамасыз ету болмаған жағдайда кепіл берушіні (ата-аналарын, туыстарын және т.б.) тартуға болады.

   Өтінім беру үшін құжаттар пакетін «Аграрлық несие корпорациясы» АҚ филиалына тапсыру қажет.

Қажетті құжаттар тізімі:

1. Жеке басын куәландыратын құжат;

2. Жоба бойынша бизнес-жоспар;

3. Шоттың болуы туралы қызмет көрсететін банктен анықтама;

4. Кредиттік берешектің, оның ішінде қаржы ұйымдарынан мерзімі өткен берешектің болуы туралы анықтама (кредиттер болған кезде);

5. Қатысушының/үміткердің жалақысын және (немесе) өзге де табыстарын растайтын құжат (жинақтаушы зейнетақы қорынан үзінді көшірме) болған кезде;

6. Кепілді қамтамасыз ету ретінде берілетін мүлікті бағалау туралы есеп;

7. Кепіл беруші және кепілмен қамтамасыз ету жөніндегі құжаттар.

Микрокредиттер төменде көрсетілген тізімдегілерді қоспағанда:

– тұрғын жылжымайтын мүлікті (оның ішінде малшылар үшін уақытша/тұрақты тұрғын үйлерді) сатып алу, салу немесе жөндеу, жер учаскелерін сатып алу (кез келген нысаналы мақсатпен);

– бағалы қағаздарды сатып алу (портфельдік инвестициялар);

– қаруды (оның ішінде қару өндіруге арналған құрамдас бөліктерді), құрамында есірткі бар заттарды немесе азаматтық айналымнан алынған басқа да мүлікті өндіру немесе сатып алу;

– ойын бизнесін ұйымдастыру және (немесе) дамыту;

– Қазақстан Республикасының заңнамасында тыйым салынған террористік және кез келген өзге де қызметке байланысты қызмет;

– моторлы көлік құралдарын шығаруды және өз өндірісіндегі жүзімнен шарап өндіруді, сондай-ақ темекі және/немесе алкоголь өнімдерін сатып алуды көздейтін жобалар, акцизделетін тауарларды/өнімдерді шығару;

– кредиторлық берешекті өтеу;

– бизнесті жүргізуге байланысты емес жеке тұтынушылық мақсаттардан басқа кез келген мақсатқа беріледі.

   Микрокредиттер арнайы комиссияның шешімі негізінде беріледі, оның отырыстарында үміткерлер өздерінің бизнес-жобаларын таныстырады.

  Микрокредит беру туралы шешім комиссиялық және нақты іс-қимыл жоспарымен өзекті, дәлелді, экономикалық негізделген, қоғамдық маңызы бар, өміршең болуы тиіс жобаның пысықталуын бағалаудың нақты критерийлері негізінде қабылданады.

  Өтінімдер 16 облыста және Астана, Алматы, Шымкент қалаларында қабылданып жатыр. Ал, Шығыс Қазақстан облысында өтінімдерді қабылдау жақын арада басталады.

   

Пікір үстеу

Э-пошта мекенжайыңыз жарияланбайды. Міндетті өрістер * таңбаланған